شفنا في آخر نقطة في المقال اللّي فات إلّي الزواج هو الوحدة وأنّو الزوز كي يعرسوا يولّيو واحد. واليوم باش نشوفوا بعض المفاهيم الغالطة في العرس وإلّي الناس ديما اطّيح فيها ومن بعد يلقاوا أنو الزواج مش ناجح وما يكملش

1. « نحبها مزيانة ونحبوا لاباس عليه »

نحنا نعيشوا في مجتمع ووسائل إعلام تصدّرلنا في فكرة الجمال الخارجي وتزرع في مخنا فكرة أنو العلاقة الناجحة لازمها تكون مع مرا مزيانة وراجل لاباس عليه ونبداو نلوجوا على المظاهر وننساوا القيم والزين متاع الناس من الداخل ويبدا كل راجل يلوّج على السندريلا وكل مرا تلوّج على أمير أحلامها. يلوّج الراجل على المرا إلّي تبهرو وتبدا المرا تجري باش تربح قلب الراجل إلّي تتمناه كل مرا.

2. « ما نعرفش شنوّة يجبدني ليه/ ليها »

فمّا حاجة تجبدني ليها ويبدا يجري وراها في كل بلاصة وهي تعجبها الحكاية أنّو فمّا شكون لاهي بيها. أما هذا غالط خاطر نحنا مش نحكيوا على مغناطيس أما على عرس وعلاقة للأبد. والجاذبية هذي ما تدومش بعد العرس. الإنجذاب يكون للحاجات الخارجية أما في العلاقة الناجحة لازم تكون الحاجة إلّي تربطنا مع الأخر أقوى وأعمق من إنبهار وقتي.

3. « هذاكا مكتوبي ونصيبي »

“هذيكا مغرفتي شهزّت” وبرشا مقولات معروفة تتقال وإنتشرت أما الزواج هو إختيار وقرار ناخذوا بعد ما نفكر ونصلّي وناخوا تأكيد من ربي.

4. الملكيّة

برشا يخمّموا أنو كي يعرّس يملك الشخص المقابل ويولّي ملكو. فمّا إكرام وإحترام في الزواج وهذا لازم يكون متبادل بين الزوز. يقول الكتاب المقدّس:

“وَلْيُوفِ الزَّوْجُ زَوْجَتَهُ حَقَّهَا الْوَاجِبَ، وَكَذَلِكَ الزَّوْجَةُ حَقَّ زَوْجِهَا. فَلاَ سُلْطَةَ لِلْمَرْأَةِ عَلَى جَسَدِهَا، بَلْ لِزَوْجِهَا. وَكَذَلِكَ أَيْضاً لاَ سُلْطَةَ لِلزَّوْجِ عَلَى جَسَدِهِ، بَلْ لِزَوْجَتِهِ” 1 كورنثوس7: 3-4

وهذا معنتها أنّو مش واحد يمتلك الأخر أما كل واحد يعطي روحو بمحبة وإقتناع للأخر. مفمّاش إستعباد في الزواج أما فمّا إحترام وإكرام.