الكتاب إلّي يؤمن بيه المسيحييون إسمو الكتاب المقدس والمسيحي يعيش ويطبق الوصايا والتعاليم إلّي ربي عطاهم في الكتاب هذا. في الكتاب هذا فمّا مجموعة الأسفار إلّي ربي أوحاها للأنبياء متاعو على ألاف السنين وإلّي تحكي من أول خلق العالم حتّى لعلامات وشنوة باش يصير في آخر الدنيا وزادا فيه التعاليم الروحية
الكتاب المقدس متنوع في الكتابات متاعو فمّا النثر وفمّا الشعر وفمّا كتب تاريخية وقصص وحكم وأمثال… والكتاب المقدس هو مصدر الإيمان المسيحي وفيه كل شيء يخص الإيمان والحياة الروحية وهو الغذاء الروحي متع المؤمن. ركيزة الكتاب المقدس هو محبة ربي للإنسان ومحبة الإنسان لربي ولخوه الإنسان.
الكتاب المقدس فيه 66 سفر (كيما نقولو سُوَر بالنسبة للقران) وهو مقسوم لقسمين:
- العهد القديم: فيه 27 سفر وهو فيه التوراة والمزامير (إلّي يتسمّاو الزابور في الإسلام للنبي داود) وكتب الأنبياء إلّي جاو قبل المسيح وتكتب باللغة العبرية.
- العهد الجديد وإلاّ الإنجيل إلّي فيه البشاير الأربعة والرسايل وسفر الرؤيا وتكتب باللغة اليونانية.
شكون إلّي كتب الكتاب المقدس؟
ماهوش إنسان إلّي كتب الكتاب المقدس من تفكيرو ومخيلتو أما ربي أوحى لناس معينة تقريبا 40 واحد من الأنبياء والتلاميذ باش يكتبو الكتاب. ورغم إلّي الناس هذوما مختلفين في كل شيء وكل واحد من بلاصة وفي فترة متع وقت دامت 1600 سنة أما الكتاب المقدس رسالتو من الأول للآخر واحدة متغيرتش وهي تحكي على محبة ربي والحل إلّي يعملوا الإنسان باش يكون في علاقة مع ربي.
وقتلّي نقراو العهد القديم نشوفوا كيفاش ربي خلق الأرض والسما والإنسان وكيفاش غلطو وكيفاش الإنسان ولاّ يغلط ويعصي ربي حتى من غير إرادتو. نشوفوا زادا وعد ربي أنو ينقذ الإنسان ويخلّصوا من النتايج متاع الخطايا والذنوب متاعو. والعهد القديم مليان زادا بالنبوات على السيد المسيح إلّي باش يحقق الوعد هذا حتى طريقة ولادتو من عذراء تذكرت في العهد القديم إلّي تكتب ميات السنين قبل ما يجي المسيح. وفي العهد الجديد نلقاو تحقيق الوعد وإلّي صار الإنسان يتميّز بيه وقت إلّي يقبل الخلاص هذايا من ربي.
لو تحب تتعرف على الكتاب المقدس وتعرف كلمة ربي ليك تنجم تتواصل معانا بالفاسبوك وإلا تنزل على إتصل بنا في الموقع ونحنا نوفرولك الكتاب مجانا وين أنت.