المحبة أنواع، مالا وقت الإنجيل يقول الله محبة.. شنية نوعها هالمحبة؟

أحنا ياسر نستخدموا كلمة نحب وفي برشا بلايص وبرشا مواضيع. نقولوا: نحب الكسكسي إلّي تطيبوا أمي، نحب جدي، نحب قطوستي، نحب ولدي، نحب مرتي، نحب خدمتي، نحب المسلسل الفلاني، نحب القهوة العربي….
في اللغة العربية والعامية كلمة حب تمشي مع برشا معاني.

أما بالطبيعة ميعنيش أنو نحبوا الحاجات هذوما والعباد بنفس الطريقة والدرجة. أكيد حبي لولدي اقوى وأكبر بمراحل من حبي للقهوة. أنا نعطي حياتي الكل على خاطر ولدي أما ما نعطيش أكثر من خمسة دينار إذا شاطت باش ناخوا قهوة.

اللغة الاصلية متاع الإنجيل هي اليونانية ومن بعد إترجم لبرشا لغات ولهجات باش الناس الكل في كل بلاصة ومن كل لغة يفهموا كلمة الله. اللغة اليونانية ياسر عميقة وساعات فيها كلمات مفماش منها باللغات الحالية. كيما الحب، باليوناني فما برشا كلمات تعبر على الحب أما إترجمت لنفس الكلمة على خاطر مفماش مرادف ليها في لغتنا.

حب الايروس: eros

ويتسمى زادا الحب الطفولي وإلا الحب الأناني الشهواني. الحب هذا فيه برشا مصالح ويخلي الشخص يغزر للطرف الأخر على أساس أنو للمتعة والمصلحة. تركيز الحب هذا هو على الأنا وإشباع الشهوات.

حب ستورج “storge

هذا الحب إلّي مربوط بالعايلة. هو حب طبيعي يتزرع فينا من ولادتنا وساعات تصير حاجات تخلي الحب هذا يتشوه.

حب الفيلو “philo

هذا الحب إلّي نحسوه في مجالات حياتنا مع صحابنا والناس القريبة لينا برشا. الحب هذا فيه برشا مشاعر قوية وحلوة. الحب هذا نحسوه لناس قريبة لينا يعني ماهوش للناس الكل ولا نجم نعطيه للناس إلّي منهضمهاش وإلا معنديش حتى علاقة بيهم. المحبة هذي فيها شروط. صحيح عندنا ناس قريبتلنا نحبوهم برشا أما ديما توقعاتنا أنو هوما زادا يبادلونا الحب هذا وأنهم يشبعوا الإحتياج إلّي أحنا نعيشوه. محبتنا هذي مهما تكون قوية أما مربوطة بردة فعل الآخر وشنوة يعطيني في المقابل من مشاعر وإهتمام.

حب الأغابي AGAPE

هذا أقوى وأرقى حب. ماهوش مشاعر أكاهو أما هو قرار ووعي كامل. الحب هذا يعطي وميستناش باش ياخوا. ديما يلوج على الباهي للآخر مهما تكون حالتو ومهما يكون رد فعلو. الأغابي هو حب من غير شروط ولا إنتظارات. حب ماهوش أناني. هذا هو الحب إلّي ربي توصف بيه في الإنجيل “الله محبة” “الله اغابي” محبة كاملة بدون شروط.

مالا وقت نقول ربي يحبني بحسب الإنجيل هذا يعني أنو حتى كي أنا منيش باهي ونغلط ونعمل حاجة خايبة ربي يقعد يحبني. ربي يحبني ديما وكي نطيح في الغلط ما يوقفش حبو أما يخلي حبو يطهرني ويوقفني على ساقيا باش نكمل ونبعد على الغلط. هو يحبنا مش على خاطر أحنا نستحقوا الحب هذا وإلا على خاطرنا عملنا أعمال باهية خلاتو يرضى علينا. هو يحبنا على خاطر هو محبة. حبو مش ضعيف مربوط بينا ومشاعرنا أما حبو قوي لا يتزعزع ولا ينقص ولا يتهز.

خلينا نشوف بعض الأيات في الإنجيل باش نفهموا المعنى العميق لكلمة أغابي

اللهُ الّذي هو غَنيٌّ في الرَّحمَةِ، مِنْ أجلِ مَحَبَّتِهِ الكَثيرَةِ (اغابي) الّتي أحَبَّنا بها، 5 ونَحنُ أمواتٌ بالخطايا أحيانا مع المَسيحِ -بِالنِّعمَةِ أنتُمْ مُخَلَّصونَ- أفسس2 : 4-5

وَلَكِنَّ اللهَ أَثْبَتَ لَنَا مَحَبَّتَهُ، إِذْ وَنَحْنُ مَازِلْنَا خَاطِئِينَ مَاتَ الْمَسِيحُ عِوَضاً عَنَّا. رومية 5: 8

شفت الحب العظيم إلّي ربي يعطيهولنا لدرجة أنو سمّانا أولاد ليه؟

شنوة يصير في حياتنا وقتلّي نستقبلوا الحب هذا؟

الأغابي، حب ربي العظيم إلّي من غير شروط، يملا قلوبنا وحياتنا الكل ويفيض فينا ووقتها الحب هذا يخرج منا للناس إلّي دايرة بينا. نولّيو نشوفوا العباد كيما هو يشوفهم ونحبوهم كيما هو يحبهم. الحب العادي الطبيعي ميخلينيش نجم نحب عدوي ولا نغفر ونسامح إلّي ضرني ووجعني خاصة كي تبدا الوجيعة كبيرة. أما وقت تفيض محبة ربي فيا نولي نحب الناس الكل بدون شروط مهما يكون إلّي عملوه ويعملوه.

السيد المسيح علّم وقال:

وَسَمِعْتُمْ أَنَّهُ قِيلَ: تُحِبُّ قَرِيبَكَ وَتُبْغِضُ عَدُوَّكَ. 44 أَمَّا أَنَا فَأَقُولُ لَكُمْ: أَحِبُّوا أَعْدَاءَكُمْ، وَبَارِكُوا لاَعِنِيكُمْ، وَأَحْسِنُوا مُعَامَلَةَ الَّذِينَ يُبْغِضُونَكُمْ، وَصَلُّوا لأَجْلِ الَّذِينَ يُسِيئُونَ إِلَيْكُمْ وَيَضْطَهِدُونَكُمْ، 45 فَتَكُونُوا أَبْنَاءَ أَبِيكُمُ الَّذِي فِي السَّمَاوَاتِ: فَإِنَّهُ يُشْرِقُ بِشَمْسِهِ عَلَى الأَشْرَارِ وَالصَّالِحِينَ، وَيُمْطِرُ عَلَى الأَبْرَارِ وَغَيْرِ الأَبْرَارِ. 46 فَإِنْ أَحْبَبْتُمُ الَّذِينَ يُحِبُّونَكُمْ، فَأَيَّةُ مُكَافَأَةٍ لَكُمْ؟ أَمَا يَفْعَلُ ذَلِكَ حَتَّى جُبَاةُ الضَّرَائِبِ؟ 47 وَإِنْ رَحَّبْتُمْ بِإِخْوَانِكُمْ فَقَطْ، فَأَيَّ شَيْءٍ فَائِقٍ لِلْعَادَةِ تَفْعَلُونَ؟ أَمَا يَفْعَلُ ذَلِكَ حَتَّى الْوَثَنِيُّونَ؟ 48 فَكُونُوا أَنْتُمْ كَامِلِينَ، كَمَا أَنَّ أَبَاكُمُ السَّمَاوِيَّ هُوَ كَامِلٌ! الإنجيل: متى 5: 43-47

وقت إلّي تقرا التعليم هذا تقول هذا مستحيل، شكون ينجم يعيش ويعمل هكا. أما وقت تستقبل محبة ربي وتفيض فيك وقتها تولي عندك القدرة والقوة أنك تعيش وتمارس الحب هذا.

تحب تعرف وتكتشف أنت وأصحابك أكثر على الله على المحبة، الأغابي أقرا الإنجيل. تنجم تتصل بينا ونبعثولك الإنجيل.

الْمَحَبَّةُ تَصْبِرُ طَوِيلاً؛ وَهِيَ لَطِيفَةٌ. الْمَحَبَّةُ لاَ تَحْسُدُ. الْمَحَبَّةُ لاَ تَتَفَاخَرُ وَلاَ تَتَكَبَّرُ. 5 لاَ تَتَصَرَّفُ بِغَيْرِ لِيَاقَةٍ، وَلاَ تَسْعَى إِلَى مَصْلَحَتِهَا الْخَاصَّةِ. لاَ تُسْتَفَزُّ سَرِيعاً، وَلاَ تَنْسُبُ الشَّرَّ لأَحَدٍ. 6 لاَ تَفْرَحُ بِالظُّلْمِ، بَلْ تَفْرَحُ بِالْحَقِّ. 7إِنَّهَا تَسْتُرُ كُلَّ شَيْءٍ، وَتُصَدِّقُ كُلَّ شَيْءٍ، وَتَرْجُو كُلَّ شَيْءٍ، وَتَتَحَمَّلُ كُلَّ شَيْءٍ. 8 الْمَحَبَّةُ لاَ تَزُولُ أَبَداً. كورنثوس الأولى 13: 4-8

لو عندك سؤال أو إستفسار إكتبلنا في الفاسبوك وفما شكون يتواصل معاك