1- شنوّة ربّي يحب يعلّمني؟

كلام ربّي ماهوش للتّرديد بدون فهم. أما كل جزء من الإنجيل نكتشفوا فيه تعاليم مهمّة وقصص صارت في التاريخ باش توصلنّا قصد الله من أجل البشريّة. وأنت تقرا في الإنجيل أنت في رحلة إكتشاف ومهم برشا أنّك ما تاخوش أية وتقصها من السياق متاعها أما تقرا الجزء كامل باش تفهم المعنى الصحيح.

برشا مغالطات وشبهات مش صحيحة على المسيحية تقالت على خاطر ناس قصّت أية من السّياق وفهموها بطريقتهم على خاطر يبدا عندهم من الأوّل هدف يحبّوا يوصلولوا وإلاّ فكرة مسبقة بأنينها.

لو أنت باحث على الحق بصدق، أقرا باش تكتشف بموضوعية وقلب مفتوح محتوى الإنجيل. وأعرف أنّو ربّي قالنّا أنو:

كُلُّ الْكِتَابِ هُوَ مُوحًى بِهِ مِنَ اللهِ، وَنَافِعٌ لِلتَّعْلِيمِ وَالتَّوْبِيخِ، لِلتَّقْوِيمِ وَالتَّأْدِيبِ الَّذِي فِي الْبِرِّ (2 تي 3 : 16)

مالا ديما أسأل السؤال هذا: شنوّة ربّي يحب يعلّمني من الجزء هذا وكيفاش نطبّقوا في حياتي؟

2-تنجّم تسأل كيما تحب:

تعوّدنا في مجتمعاتنا أنّو السؤال في بعض المواضيع عيب وخاصّة في المواضيع الرّوحية. أما السيد المسيح قال:

فَتِّشُوا الْكُتُبَ لأَنَّكُمْ تَظُنُّونَ أَنَّ لَكُمْ فِيهَا حَيَاةً أَبَدِيَّةً. وَهِيَ الَّتِي تَشْهَدُ لِي (الإنجيل: يوحنا5: 39)

ربّي أعطانا رسالة من عندو في كتابو باش نفهموها ونقتنعوا بيها. وهو خلقلنا عقل باش نلوّجوا عليه وما نكونوش عميان روحيّين. برشا سألو عن الله، عن حياتهم بعد الموت، عن قصد الله ومشيئتو في حياتهم وعلى خاطرهم سألوا بصدق وبحثوا ومشدّوش في المسلّمات، حياتهم تغيّرت ومعرفة الحق عطاتهم حرّية.

أهم حاجة أنّك ما تستسلمش مهما حسّيت روحك داخل بعضك أو مش فاهم نقاط معينة، ديما واصل وإبحث وأسأل.

دوّن أسئلتك وأقرا الإنجيل وإبحث بقلب صادق

وأهم حاجة وأنجع وسيلة:

3- الصّلاة:

إدعي لربّي أنّو هو يفهمك على خاطر هو الوحيد القادر أنّو هو ينوّرلك الحق ويوضّحلك ويرشدك خاطرو وعدنا في الكتاب المقدّس:

أُعَلِّمُكَ وَأُرْشِدُكَ الطَّرِيقَ الَّتِي تَسْلُكُهَا. أَنْصَحُكَ. عَيْنِي عَلَيْكَ. (سفر المزامير 32 : 8)

لو عندك سؤال أو إستفسار إكتبلنا في الفاسبوك وفما شكون يتواصل معاك