ربي خلق الإنسان باش نعيشوا معاه في علاقة محبة وإتكال وتواصل معاه. الله عندو برشا طرق أعلن فيها على روحو وورّا للانسان أنّو موجود ويهتم بكل تفاصيل حياتو. وقت نشوفوا الطبيعة والتاريخ والضمير البشري نجموا نلقاوا إعلانات الله في كل جزء فيها.

اَلسَّمَاوَاتُ تُحَدِّثُ بِمَجْدِ ٱللهِ، وَٱلْفَلَكُ يُخْبِرُ بِعَمَلِ يَدَيْهِ….. وَصَايَا ٱلرَّبِّ مُسْتَقِيمَةٌ تُفَرِّحُ ٱلْقَلْبَ. أَمْرُ ٱلرَّبِّ طَاهِرٌ يُنِيرُ ٱلْعَيْنَيْنِ. خَوْفُ ٱلرَّبِّ نَقِيٌّ ثَابِتٌ إِلَى ٱلْأَبَدِ. أَحْكَامُ ٱلرَّبِّ حَقٌّ عَادِلَةٌ كُلُّهَا. أَشْهَى مِنَ ٱلذَّهَبِ وَٱلْإِبْرِيزِ ٱلْكَثِيرِ، وَأَحْلَى مِنَ ٱلْعَسَلِ وَقَطْرِ ٱلشِّهَادِ. (سفر المزامير لسيدنا داود 19)

زادا ربي كلّمنا عن طريق الأنبياء والرسل باش نفهموا رسالتو وقصدو لحياتنا. والكلام هذا تسجّل في كتاب الله المقدس.

الكتاب المقدّس هو إعلان الله المكتوب وهو أساس إيماننا ليه قوّة تأثير وسلطان كبيرعلى حياة كلّ شخص يقراه ويطيعو.

أما محتاجين نفهموا موضوع ديما يصير فيه التباس وعدم فهم وهو موضوع الوحي. برشا يفكروا أنّو ربي أملى على سيدنا جبريل الملاك كلامو إلّي هو بيدو يهبط ويمليه على النبي كلمة كلمة والنبي يدونو على ورق كيما سمعو بالضبط. وفي الواقع ماهوش هذا الوحي الإلهي.

شمعنتها الوحي؟

في الكتاب المقدّس مكتوب:

كُلُّ ٱلْكِتَابِ هُوَ مُوحًى بِهِ مِنَ ٱللهِ، وَنَافِعٌ لِلتَّعْلِيمِ وَٱلتَّوْبِيخِ، لِلتَّقْوِيمِ وَٱلتَّأْدِيبِ ٱلَّذِي فِي ٱلْبِرِّ (2 تيموثاوس 3 : 16)

كلمة موحى به من الله هي ترجمة للغة اليونانية إلّي تكتب بيها الإنجيل θεόπνευστος وتعتي بالضبط أنفاس الله أو نسمة الله.
وقت ربّي خلق سيدنا آدم مكتوب في التوراة في سفر التكوين:

وَنَفَخَ فِي أَنْفِهِ نَسَمَةَ حَيَاةٍ. فَصَارَ آدَمُ نَفْسًا حَيَّةً (سفر التكوين 2 : 7)

وكيما نسمة الله إلّي خلقت أدم هي إلّي عطات حياة لللإنسان الأول زادا كلمة الله هي كلمة حيّة وتحيي نفوسنا. قال السيد المسيح:

اَلْكلاَمُ الَّذِي أُكَلِّمُكُمْ بِهِ هُوَ رُوحٌ وَحَيَاةٌ (الإنجيل: يوحنا 6 : 63)

الوحي في المسيحية

في الإنجيل وفي التوراة زادا نحنا ما نؤمنوش بالوحي الإملائي كيما قلنا الفوق. وفي الواقع أي واحد يفترض الطريقة هذي من الوحي لازم يلقى حل وإجابات على المشاكل هذوما

1. لغة الوحي: وقتلّي نقولوا ربي أملا كلام حرف حرف لشخص معيّن. هذا يعني أنّو هو إستخدم لغة معينة على أساس أنّو هو لغتو هو الخاصة. وهذا ماهوش منطقي على خاطر أول حاجة اللغة هذي محدودة وتخلقت من الإنسان في وقت معيّن مهما تكون قديمة وسامية. وثاني حاجة اللغات هي صناعة بشرية باش ينجموا يتواصل مع بعضهم ويفهموا حاجات بحواسهم البشرية. هذي وسيلة الإنسان المحدودة باش ينجم يتواصل ويفهم. ربّي ينجم يستخدم اللغات هذي باش يفهمنا ويقربلنا رسالتو بطريقة أوضح أما ميجيش أنّو تكون واحدة من اللغات هذوما هي اللغة متاعو الخاصة والمقدسة. ربي هو إله البشر الكل من كل اللغات وكلمتو لازم تكون مفهومة للجميع

2. ّدور النبي يولّي يقتصر في أنّو يكتب إلّي يسمع ويتملا عليه يعني هو فقط ناسخ وكاتب. كيما القلم وإلا clavier يكتب من غير فهم ولا تدخّل. النبي ماهوش ناسخ أو كاتب، النبي هو يستقبل من ربّي رسالتو ووحيو. مالا النبي عندو دور في الإستقبال وفي توصيل الرسالة هذي للشعب بلغتو الخاصة وبكلامو وبأسلوبو وبطريقتو في التعبير.

3. الإملاء والنسخ الحرفي يخلّي فمّا إمكانية كبيرة برشا للنسيان والغلط. ووقتها باش يتحسب كل غلطة في النسخ وكاينّو موجّه لربي.

المسيحي يؤمن إلّي ربي إستخدم لغة البشر باش تكون وسيلة يكلمّنا بيها. ربّي كلّم النبي وكاتب الوحي وقادو بروحو أنّو يدوّن الوحي ويقولو بأسلوبو وبلغتو الخاصة كيما قال سيدنا داود:

تَكَلَّمَ رُوحُ الرَّبِّ بِفَمِي، وَكَلِمَتُهُ نَطَقَ بِهَا لِسَانِي (سفر صموئيل الثاني 23 : 2)

الكتاب المقدس ماهوش مكتوب برغبة الإنسان:

إِذْ لَمْ تَأْتِ نُبُوءَةٌ قَطُّ بِإِرَادَةٍ بَشَرِيَّةٍ، بَلْ تَكَلَّمَ بِالنُّبُوآتِ جَمِيعاً رِجَالُ اللهِ [الْقِدِّيسُونَ] مَدْفُوعِينَ بِوَحْيِ الرُّوحِ الْقُدُسِ. (الإنجيل: رسالة بطرس الثانية 1 : 21)

الله هو إلّي أوحى بالكتاب المقدّس وحي كامل ومطلق أما زادا ربّي سمح أنّو تتسجّل حاجات في الكتاب المقدّس ماهيش كلام الله أو الحاجة إلّي يحبنا نطيعوها كيما كلام الشيطان إلّي قالو لحواء في سفر التكوين. كلام الشيطان ماهوش الحق أما ربّي أمر أنّو الكتاب هذا يتسجّل باش نفهموا خطة إبليس وسبب الخطية وغلطة أدم وحواء.

تسجلت زادا برشا غلاط وذنوب لشعب الله من غير إستثناء باش نتعلموا دروس من حياتهم وأغلاطهم ونفهموا أنّو مفمّاش حتى حد معصوم من الغلط والكلنا محتاجين الله أنو يطهرنا وينقّينا وتكون الحكايات هذوما عبرة لينا ونعرفوا مشيئة ربي لينا.

اليوم فرصة ليك أنك تكتشف وتقرا الإنجيل وتشارك الناس الدايرة بيك بحكمة ربي وكلمتو الحق. اتصل بينا في الخاص وإلا في صفحة الفاسبوك هوني وأحنا نوفرولك الإنجيل مجانا وين أنت.

لو عندك سؤال أو إستفسار إكتبلنا في الفاسبوك وفما شكون يتواصل معاك