على مر الزمان والإنسان يسأل ويلوّج على مصيرو بعد الموت وقصد الله من حياتو وهدف وجودو على الأرض. أما شكون إلّي ينجّم يجاوبوا على كل هالتساؤلات والغموض؟ شكون غير الله القدير عن طريق كلمتو في الكتاب المقدس؟
في الكتاب المقدّس موجود قصد الله للإنسان وطريق الخلاص ومصير الإنسان بعد الموت وهدف وقيمة وجود الإنسان.
بالحق قدّاش ربي عظيم أنّو عطانا كلمتو باش يورّينا الطريق للسماء وما يخلّيناش ضايعين في هالدنيا المليانة ضجيج وعدم وضوح.
إبليس نجح أنّو يلهّي الإنسان وفكرو على كلمة ربي ويتخدّروا بالأثام وشهوات الحياة. وكل ما الإنسان يبعد على كلمة ربي يعيش في الضياع والضلال. كيما قال السيد المسيح لجماعة من اليهود:
“أَلَسْتُمْ فِي ضَلالٍ لأَنَّكُمْ لاَ تَفْهَمُونَ الْكِتَابَ وَلاَ قُدْرَةَ اللهِ؟” الإنجيل بحسب مرقس 12: 24
قدّاش تنطبق الكلمة هذي على برشا ناس رماو كلمة الله وراهم ومقبلوش كلمة الله بوداعة وخضوع
“وَهؤُلاَءِ هُمُ الَّذِينَ عَلَى الطَّرِيقِ: حَيْثُ تُزْرَعُ الْكَلِمَةُ، وَحِينَمَا يَسْمَعُونَ يَأْتِي الشَّيْطَانُ لِلْوَقْتِ وَيَنْزِعُ الْكَلِمَةَ الْمَزْرُوعَةَ فِي قُلُوبِهِمْ.” الإنجيل بحسب مَرقُسَ 4: 15
هذي قلوب ميهمهاش كان في حياتها على الأرض والعالم وفيسع الشيطان يجي ويسرق البذرة إلّي ترمات وإلّي مدخلتش ومنبتتش في القلوب.
نصلّي أنو ربي يليّن كل قلوب كاسحة ومتكبرة أنها تسمعوا وتعرفوا. يارب إنزع علينا كل تكبّر وعدم إشتياق لكلمتك ولمعرفتك بالحق. أمين
كلمة الله ماهيش المرشد لرحلتنا مع ربي أكاهو أما زادا هي تأهلنا وتطهّرنا باش نكونو حاضرين ومستعدّين في حياتنا الروحية. تعلّمنا وتورّينا كيفاش نعيشوا في القداسة بعيد على الخطايا وفي طاعة الله ورضاه.
كلمة الله تكشف حقيقة نفس الإنسان وقدّاش هو خاطي مليان بالذنوب وتقودوا أنّو يعرف عجزو ووقتها يبدا يتوب ويرجع لله ويطلب منّو المعونة باش يعيش حياة جديدة معاه. ووقتها تصير الولادة الروية إلّي بيها الانسان يولّي عندو الحياة الأبدية مع الله. إكتشف شمعنتها نتولد من جديد في المقال هذا.
الإنسان عطشان ومحتاج يعرف محبة ربي العظيمة ليه وأنو فمّا حل لمشاكلو وعبودية الخطية وانّو مع الله فمّا فرصة للخلاص والحرّية.
مالا نفهموا أنّو الكتاب المقدّس ماهوش دليل للجنة أكاهو أما هو غذاء لأرواحنا نحتاجوه كل يوم ومن غيرو نموتو. النفس إلّي ولّات عندها حياة جديدة تتغذّى من كلمة الله
لَيْسَ بِالْخُبْزِ وَحْدَهُ يَحْيَا الإِنْسَانُ، بَلْ بِكُلِّ كَلِمَةٍ تَخْرُجُ مِنْ فَمِ اللهِ الإنجيل بحسب متى 4: 4
وقت إلّي نتولدو روحيّا يولّي الغذاء متاع أرواحنا هو كلمة الله. الطفل البيبي وكان تعطيه ثروات الأرض ما تعنيهش أما إحتياجو وحياتو في حليب أمّو. وهكا لازم يكون لهفتنا وإشتياقنا لكلمة الله إلّي تغذّينا وتكبّرنا
وَكَأَطْفَالٍ مَوْلُودِينَ حَدِيثاً، تَشَوَّقُوا إِلَى اللَّبَنِ الرُّوحِيِّ النَّقِيِّ لِكَيْ تَنْمُوا بِهِ إِلَى أَنْ تَبْلُغُوا النَّجَاةَ، الإنجيل: رسالة بطرس 2: 2
كلمة ربّي ماهيش إحتياج أكاهو أما في قراءتها والتأمّل فيها متعة ولذة ما تتوصفش.
أَشْهَى مِنَ ٱلذَّهَبِ وَٱلْإِبْرِيزِ ٱلْكَثِيرِ، وَأَحْلَى مِنَ ٱلْعَسَلِ وَقَطْرِ ٱلشِّهَادِ سفر المزامير لسيدنا داود الإصحاح 19 الأية 10
هي تعطي للأرواحنا راحة وفرح يفوق العقل وما يتزعزعش مهما يصير حوالينا
وُجِدَ كَلَامُكَ فَأَكَلْتُهُ، فَكَانَ كَلَامُكَ لِي لِلْفَرَحِ وَلِبَهْجَةِ قَلْبِي سفر النبي إرميا 15: 16
كلمة الله زادا هي كيما النور للمؤمن إلّي تنوّرلوا حياتو
سِرَاجٌ لِرِجْلِي كَلَامُكَ وَنُورٌ لِسَبِيلِي سفر المزامير لسيدنا داود الإصحاح 119 الأية 105
كلمة الله هي تنوّر سبيلنا وتقودنا في كل تفاصيل حياتنا وتخلّينا نجموا نميزوا ما بين أعمال إبليس ومشيئة الله في حياتنا
كلمة الله زادا تخلّينا نحفظوا نفوسنا في القداسة وتحمينا من الشهوات والخطايا. هي الماء إلّي يطهّر وينظف حياتنا.
9كَيْفَ يَسْلُكُ الشَّابُّ بِطَهَارَةٍ؟ بِأَنْ يَعِيشَ حَسَبَ كَلِمَتِكَ. 10أَطْلُبُكَ مِنْ كُلِّ قَلْبِي، فَلَا تَجْعَلْنِي أَضِلُّ عَنْ وَصَايَاكَ. 11خَبَّأْتُ كَلَامَكَ فِي قَلْبِي، لِئَلَّا أُخْطِئَ إِلَيْكَ. سفر المزامير لسيدنا داود الإصحاح 119 من9 الى 11
كلمة الله زادا تشفي القلوب المكسورة والنفوس المحنيّة.
الْغَمُّ فِي الْقَلْبِ يَحْنِي الْإِنْسَانَ، وَالْكَلِمَةُ الطَّيِّبَةُ تُفَرِّحُهُ. سفر الامثال لسيدنا سليمان الحكيم الإصحاح 12 الأية 25
وفي كتاب الله نلقاوا الكلمة المفرحة إلّي تعزّينا وقت المرض وتشجّعنا وقت الضعف.
كلمة الله زادا هي سيف في حروبنا مع الشيطان في حياتنا اليومية وفي العالم ضد الشهوات وكل مرة ندخلوا في مشكلة أو يحط إبليس قدّامنا حاجة باش تطيّحنا نحطّوا كلمة الله قدّام عينينا ونقولوها للمشكلة إلّي قدامنا.
كَلِمَةُ اللهِ حَيَّةٌ وَفَعَّالَةٌ، وَهِيَ حَادَّةٌ أَكْثَرُ مِنْ كُلِّ سَيْفٍ بِحَدَّيْنِ، وَتَنْفُذُ إِلَى الْعُمْقِ، إِلَى مَا بَيْنَ النَّفْسِ وَالرُّوحِ، وَمَا بَيْنَ الْمَفَاصِلِ وَالنُّخَاعِ، وَهِيَ قَادِرَةٌ أَنْ تَفْحَصَ أَفْكَارَ الْقَلْبِ وَنِيَّاتِهِ. الإنجيل؛ عبرانيين 4: 12
مفمّاش أهم من كلمة الله في حياتنا وقدّاش عظيمة البركات إلّي نجموا ناخذوها من الكتاب المقدس واليوم ندعوك أنك تقرا الكتاب هذا إلّي فيه النور إلّي يهديك والطعام إلّي يقويّك والدوا إلّي يشفيك والقوّة إلّي تشجعك والتعليم إلّي يقودك ويحميك. هو “خريطة المسافر وعصا الرحّال وسيف المحارب ودستور المحارب.
تحب تقرا الإنجيل وتعرف كلمة الله لحياتك وتستمتع برحلة جديدة في إكتشاف خطة ربي ليك؟ اتصل بينا في الخاص وأحنا نوفرولك نسخة من الإنجيل وين أنت.