أنت أب أو أم وديما تعاني أنو صغارك مش لاهين بقرايتهم؟ تلقاهم لاهين يلعبوا ويتململوا وقت الدراسة؟
نشجعك أنك تقرا النقاط هذي وتطبّقها على أولادك
كيفاش تشجّع صغيرك على الدراسة؟
1- عوّدوا على الدراسة والتعليم في عمر صغير
تنجم تعمل هكا عن طريق قراية القصص والكتب القصيرة ليه وتعلموا الرسم والتلوين والحروف العربية والأجنبية وقدّملوا أسئلة ساهلة ليه وزادا علمو كلمات أجنبية مختلفة. في عمرو الصغير ينجم يتعلم برشا حاجات بسرعة وبرشا حماس.
2- حدّدلوا ساعت لعب خاصة بيه
خليه يشوف شوية فيديوهات أو تلفزة أو يلعب أما لساعات محددة وخلي العابو بسيطة وساهلة.
3- تحديد عدد ساعات النوم
حتى وقت العطلة خليه يقوم في وقت واحد ميتبدلش. وحددلو وقت نومو على حسب عمرو: مثال عدد ساعات النوم للعمر ما بين 4 سنوات إلى 12 سنة من 8 إلى 10 ساعات يومياً. فما صغار يحتاجوا يرقدوا شوية في النهار وفما صغار لا. أنت تعرف إحتياج صغيرك.
4- خوذ صغيرك في خرجة قصيرة
مهم برشا أنك تخرّج ولدك باش يتفرهد وتريحوا شوية من القراية والإمتحانات. الخرجة هذي تجدّد نشاطو وحيويتو وتعاونوا باش يكمّل الجمعة الجاية في نشاط وحيوية من غير ما يقلق.
5- قابل المعلمين متاعو
قابل معلمينو وأسأل على المستوى متاعو التعليمي ومعرفتك للعلاقات متاعو الخاصة مع أصحابو. ساعات يبدا الطفل يعاني من مشاعر حب أو كره للمعلم متاعو وفي اللقاء تنجم تفهم شعور صغيرك وتخدم على الشعورالإيجابي
تنجم حتى تتفاهم مع المعلم أنو تجيبلوا هدية أنت تشريها وتعطيها للمعلم باش يقدمها لصغيرك باش يشجعوا وهذا يخلي العلاقة بيناتهم أحسن وأعمق
6- خلق جو مريح ما بين الأهل والطفل
الصغير ديما يراقب تصرفاتك على خاطر أنت المثال الأعلى متاعو أما من أهم الأمور إلّي لازمك تعملها هي أنك تخافظ على الهدوء متاعك في الدار وتعمل قعدة عائليية بسيطة تعاون فيها ولدك على التعبير على مشاعرو كيفاش يعمل حوار مفييد تعرف فيه المشاكل إلّي يعاني منها صغيرك وتلقاو الحلول من غير تخويف أو تعقيد وهذا يعاون صغيرك أنو يكون عندو أكثر ثقة فيك ويخليك أنت مصدر الراحة ويكون متوازن نفسيا.
7- تطبيق الحاجات إلّي يتعلمها الطفل في المدرسة
وقت إلّي تطبق المعلومات إلّي ولدك تعلمها في المدرسة تنجم تعاونوا أنو يفهم أكثر وتزيد المعلومة تثبت في عقلو بسهولة.
صغيرك يستحق منك الإهتمام وأنك تعمل مجهود باش تعاونوا وتعطيه الدعم إلّي يحتاجوا وهذا هو أعظم إستثمار في صغيرك خاطربيه يعيش ولدك أو بنتك في نمو نفسي سليم وتفوق علمي في المستقبل
لو عندك سؤال أو إستفسار إكتبلنا في الفاسبوك وفما شكون يتواصل معاك