أنا أمل من صفاقس في صغري حلمت بروحي واقفة في الليل وحدي و نغزر للسماء و فما كتاب يهبط مالسماء لكلو نور و كي نحل لكتاب مانفهمش اللغة الي مكتوب بيها أما من منظر لكتاب انو قديم برشا برشا كتاب ديني يتحدث على ربي أما مش القرآن الحلم هذا بقى يتعاودلي حتى لين وصلت عمري 18 كي آمنت بالمسيح
أما سبب إيماني مش الحلم هذا أنا كنت مسلمة متشددة كنت متعصبة و نحب نطبق الإسلام الحقيقي على الناس الكل كنت بنية خايبة برشا قاسية و متدينة كنت مع قتل تارك الصلاة و كنت نكره لبنات الي متلبسش حجاب كنت نحب نلبس نقاب و ندعو الناس الكفار (في نظري أنا وقتها) الى الإسلام كنت نشوف في روحي على حق و اني طفلة مميزة و الناس الكل كانت تحبني على خاتر التقوى الخارجية ههههههه هذا الكل كان قبل ما نوصل لل 18 عام لقيت طريقة باش تدخل الناس الإسلام و هي بالفايسبوك نهار 21 جويلية مع 11:30 هبطت ستاتي في صفحة لتعليم اللغة الانجليزية كتبت فيها (hello my friends I am Amal from Tunisia I hope to meet Christian friends ) بالطبيعة كانت هاذي طريقة باش نوصل للمسيحيين و ندخلهم الإسلام وقتها حكا معايا مسيحي بالصدفة طلع ولد بلادي و من نفس المنطقة الي نسكن فيها بقيت نحكي معاه من 21 جويلية 2017 حتى 19 أفريل 2018 نهارتها أخر نهار كنت فيه مسلمة ليلتها حلمت بروحي نمشي في الطريق وين نسكن و كان الطريق الكلو ظلام وراي ظلام و قدامي نور و كانت السماء مغيمة و سودة وراي و قدامي صافية و كنت نسرع باش نبعد أكثر مالظلام خاترني خائفة ياسر و كي فقت الصباح مشيت قابلتو و قابلت معاه قسيس أنا وقتها كنت مطلعة على القرآن و الإسلام و عرفت الي الطريق الي أنا فيه هو السبب الي خلاني انسانة خايبة و متشددة وقتها قلت للقسيس اني نحب نبقى لا دينية و نترك الإسلام قلي لازم تكمل في البحث متاعك و زيد أقرأ توا تكتشف حاجات ماكنتش تتصورها كملنا حديثنا مع لعشية و كي رجعت للبلاصة الي نسكن فيها تصدمت صدمة كبيرة الي حلمت بيه صار وقتها صار ٱعصار قوي صبت مطر قوية برشا طيحت حيوط و شجر و بوتوات ضو كانت السماء مظلمة و برشا ناس ماتت حسيت بحاجة مش عادية مافهمتش رسالة ربي ليا أما قصيت فورفاي و بديت نعمل في بحث على الانترنت على المسيحية شكون يسوع علاش لازمنا نمنو بيه و شنوا تعاليمو و تفسير الانجيل وقتها أول مرة في حياتي نقرا كتاب كيف هكة قمة المحبة قمة الرحمة و المغفرة الطيبة الحنان الوداعة الحرية الإحترام التقدير الإنسانية بالطبيعة الحاجات هذي ماكنتش نعرفهم كنت نعرف القتل لتارك الصلاة الكره للكافر العقاب الخاطئ ووووووو حاجات خايبة برشا وقتها وين عرفت الي أنا انسانة خايبة قلبي ظلام كره فساد خطيئة لغريبة ماكنتش نشوف في هاذا الكل فيا صدقوني يسوع عرا لغطاء الي كان مخبي عليا لحقيقة حقيقتي لخايبة و الفاسدة الي ماكان يعرفها حد كان أنا كنت نقرا و عجبني ياسر تعاليمو و القداسة الحقيقية وقتها قررت نتبع ربي يسوع صدقوني صدقوني تبدلت 180 درجة راهو يسوع قتلني قتل الطبيعة الفاسدة الي فيا يسوع صنعلي قلب جديد عقل جديد و شخصية جديدة أنا توا وليت انسانة طيبة برشا قلبي حنين و الكلو محبة تعلمت نحب أعدائي كيما علمني حبيبي يسوع تعلمت نصلي من أجل جميع الناس و نغفر و نسامح تعلمت القداسة الحقيقية برشا حاجات باهية تخلقت فيا مش أنا الي بدلت روحي من مسلمة متشددة و متعصبة لانسانة بكل معنى الكلمة لا مش أنا الي عملت هكا يسوع هو الي عمل هذا فيا و توا أنا اعترفت باتباعي ليسوع للناس الكل بكل فخرة و شجاعة الناس ملول كرهتني أما كي لاحظت طبيعتي و أخلاقي مانجمتش ما تحبنيش مانجموش يغطو النور الي خلقو يسوع فيا هذي قصتي مع يسوع قصة كتبتها بالدموع خاطر كان حب حقيقي و كان طريق الحق و الحياة و هذي الحياة عطاهالنا يسوع مش بفضل اعمالنا أما بفضل حبو لعظيم لينا و أنا نحبو برشا برشا برشا و نحبكم انتم زادا ربي يبارك حياتكم و يخلص نفوسكم