الله متواضع

1هَلِّلُويَا. سَبِّحُوا يَاعَبِيدَ الرَّبِّ، سَبِّحَوا اسْمَ الرَّبِّ. 2لِيَكُنِ اسْمُ الرَّبِّ مُبَارَكاً مِنَ الآنَ وَإِلَى الأَبَدِ. 3لِيُسَبَّحْ بِاسْمِ الرَّبِّ مِنْ مَشْرِقِ الشَّمْسِ إِلَى مَغْرِبِهَا. 4الرَّبُّ مُتَسَامٍ عَلَى جَمِيعِ الأُمَمِ، وَمَجْدُهُ فَوْقَ السَّمَاوَاتِ. 5مَنْ هُوَ نَظِيرُ الرَّبِّ إِلَهِنَا السَّاكِنِ فِي الأَعَالِي؟ 6الْمُطِلِّ مِنْ عَلْيَائِهِ إِلَى أَسْفَلَ لِيَرَى السَّمَاوَاتِ وَالأَرْضَ. 7يُنْهِضُ الْمِسْكِينَ مِنَ التُّرَابِ، وَيَرْفَعُ الْبَائِسَ مِنْ الْمَزْبَلَةِ، 8لِيُجْلِسَهُ مَعَ أَشْرَافِ شَعْبِهِ. 9يَرْزُقُ العَاقِرَ أَوْلاَداً. يَجْعَلُهَا أُمّاً سَعِيدَةً. هَلِّلُويَا. مزمور 113

الله خالق الكل، كلّي المعرفة والحكمة. هو القادر بكلمة منّو أنو يفنى الجميع ويخلق كائنات جديدة وأراضي جديدة. هو الله إلّي مجدو فوق كل شيء وهو العالي المتسامي على كل مخلوقاتو. أكيد مافما حتى واحد يختلف على قدرة الله الكاملة وقوتو ومجدو…

الله مش محتاج لحتى شيء. مش محتاج للإنسان ولا لأي مخلوق. هو كامل أما هو قرّر أنو يخلق عالم كامل يعيش فيه الإنسان. خلق الإنسان كائن عندو إرادة وحرية وهو إلّي يقرّر خضوعو وعبادتو لله وإلاّ لا. ربي كان ينجم يفرض على الجميع أنهم يعبدوه وميعطيهم حتى سبيل أنو يعصيوه أما هو خلقهم أحرار أنهم يختاروه ويعبدوه بكامل إرداتهم. ملايين رفضتو وترفض أنها إتبعوا  أما هو قرّر أنو يعطيهم القدرة باش يحبّوه ويتبعوه.

الله الخالق العظيم قرّر أنو يتلهى بكل تفاصيل الإنسان مهما تكون صغيرة وتافهة ويعبّر على محبتو ليه رغم أنو مش محتاج أنو يعمل هكا. وهذا هو التواضع.

وقت إلّي الأب يحب يعلّم ولدو درس مهم ويحب الكلام يوصلو بالساهل والواضح، شنوة يعمل؟ ياقف وقفة تخوّف ويبدا يتكلم بلغتو الصعيبة إلّي الطفل ميفهمهاش وإلاّ يتحنا ويهبط في مستوى ولدو ويتكلم معاه بوداعة وطريقة بسيطة؟ أكيد أنت تعرف شنوة يعمل الآب الحكيم المتواضع…

وإلهنا المحب هو متواضع وهو معلّمنا في التواضع على خاطرو قرّر أنو يهبط لمستوانا باش يوصلنا رسالتو بأبسط طريقة نفهموها. التواضع ما عمرو ما كان إستنقاص أما هو عكس التكبر والعجرفة وهي ما تلغيش عظمتو وقدرتو. قال سيدنا أيوب على ربي:

“4هُوَ حَكِيمُ الْقَلْبِ وَعَظِيمُ الْقُوَّةِ، فَمَنْ تَصَلَّبَ أَمَامَهُ وَسَلِمَ؟ 5هُوَ الَّذِي يُزَحْزِحُ الْجِبَالَ، فَلاَ تَدْرِي حِينَ يَقْلِبُهَا فِي غَضَبِهِ. 6هُوَ الَّذِي يُزَعْزِعُ الأَرْضَ مِنْ مُسْتَقَرِّهَا فَتَتَزَلْزَلُ أَعْمِدَتُهَا. 7هُوَ الَّذِي يُصْدِرُ أَمْرَهُ إِلَى الشَّمْسِ فَلاَ تُشْرِقُ، وَيَخْتِمُ عَلَى النُّجُومِ. 8يَبْسُطُ وَحْدَهُ السَّمَاوَاتِ، وَيَمْشِي عَلَى أَعَالِي الْبَحْرِ. 9هُوَ الَّذِي صَنَعَ النَّعْشَ وَالْجَبَّارَ وَالثُّرَيَّا وَمَخَادِعَ الْجَنُوبِ، 10صَانِعُ عَظَائِمَ لاَ تُسْتَقْصَى وَعَجَائِبَ لاَ تُحْصَى.” أيوب 9: 4-10

الله ماهوش متكبر، الله متواضع وهذي قمة القوة والعظمة. تنازل باش يتعامل مع الإنسان الناقص ويحميه ويرعاه كل يوم. شكون فينا ينجم يعرف ويعيش ويستمتع بالطريق مع الله لو مكانش ربي متواضع ومستعد باش يتنازل ويتعامل معانا كيما الأب الراعي الوديع المحب.

الله على خاطرو متواضع سمّى إبراهيم “خليل الله” ومعنتها صديقو وشاركوا الحاجات إلّي باش يعملهم مع شعوب أخرى وقال في التوراة : “هل أُخفي عن إبراهيم ما أنا فاعله؟” مكتوب زدا في الكتاب المقدس:

“السَّيِّدَ الرَّبَّ لَا يَصْنَعُ أَمْراً إِلَّا وَهُوَ يُعْلِنُ سِرَّهُ لِعَبِيدِهِ الْأَنْبِيَاءِ” عاموس 3:7.

ربي يكشف مشيئتو وإلّي باش يعملوا مش على خاطرو محتاج أما على خاطرو يحب. وهذا هو التواضع.

الله على خاطرو متواضع سمّى موسى “كليم الله” وكان موسى من أكثر الأنبياء إلّي ربي كلمهم ووراهم شريعتو وقوانينو بالتفصيل. ربي إستخدم سيدنا موسى وأنبياء أخرين قناة أنهم يوصلوا كلمتو.

الله على خاطرو متواضع حب يكلّم الإنسان ويورّيه مشيئتو وقصدو لحياتو. كلمو بطريقة بسيطة ومتسلسلة عن طريق الأنبياء إلّي بعثهم للإنسان وحفظ كلمتو الحية من ألاف السنين وخلانا في الكتاب المقدس بلغة بسيطة مفهومة أما عميقة وتحيي الروح والنفس

الله على خاطرو متواضع قرّر أنو ينقذ الإنسان من حكم الموت وينزل هو بإرادتو باش ينجّيه ويورّيه الطريق عن طريق المسيح يسوع. هذي قمّة التواضع وفي الإنجيل مكتوب:

“وَبِاعْتِرَافِ الْجَمِيعِ، إِنَّ سِرَّ التَّقْوَى عَظِيمٌ: اللهُ ظَهَرَ فِي الْجَسَدِ، شَهِدَ الرُّوحُ لِبِرِّهِ، شَاهَدَتْهُ الْمَلاَئِكَةُ، بُشِّرَ بِهِ بَيْنَ الأُمَمِ، أُومِنَ بِهِ فِي الْعَالَمِ، ثُمَّ رُفِعَ فِي الْمَجْدِ.” 1 تيموثاوس 3 : 16- 17

الله يجي في صورة إنسان؟ مش قابلها مخك مش هكا؟ تقول الله أعظم من أنو يجي في صورة إنسان وأنا نقولك صحيح أنا زادا نقول الله أعظم وأمجد برشا أما هو قرّر يعمل هذا علاش؟ على خاطرو يحبنا وعلى خاطرو متواضع وعلى خاطر هذا ما ينقصش من قيمتو بالعكس يخلّينا ننحنيوا أمامو ونشكروه على محبتو العظيمة وقدرتوا إلّي تفوق عقولنا وتفكيرنا.

كان فمّا ملك من أعظم الملوك وأقواهم في العالم الكل. كان الملك هذاكا يتمشى في المملكة متاعو وسمع صوت من البحر متع طفل قاعد يعيّط ويغرق. الملك عرف أنو هذاكا ولدو إلّي قاعد يغرق. ما فكّرش وقتها أنو يستنا الجنود والحاشية متاعو يهبطوا يجيبوا ولدو من الماء ولا خمّم في حوايجو المرصعة بالذهب واللولو أنو باش يبلهم ويفسّدهم ولا قعد يفكر أنو هذا باش ينقصلوا من قيمتو كملك لو هو هبط في الماء. هو خمم في حاجة واحدة أنو ولدو الغالي على قلبو قاعد يغرق وهبط في الماء وهزو ونقذو من الموت….

الله ملك الملوك ورب الأرباب قرّر أنو يهبط ويتنازل ويجي على الأرض وينقذك وينقذني من حكم موت وبعد عليه. حاولنا ننقذوا رواحنا ونوصلوا لربي بكل الطرق أما منجمناش خاطر ديما أغلاطنا تبعدنا وتخلينا نبعدوا أكثر و”أجرة الخطية موت” أما على خاطر ربي متواضع ورحيم ومحب قرّر هو إلّي بيديه ينقذنا وينجّينا.

أيه صحيح حاجة تفوق عقولنا على خاطر عقولنا محدودة. وحاجة تنخز قلوبنا على خاطر قلوبنا مليانة ذنوب وخطايا أما وقت إلّي نقبلو العطية المجانية هذي من عند ربي أذهاننا تتجدّد وقلوبنا تتطهّر ونتملاو بالمحبة الفياضة من عند إلهنا العظيم.

يا رب نحب نشكرك على خاطرك إخترت أنك تكون متواضع وحبيتنا رغم كل أثامنا وجيت ونجيّتنا من حكم الموت وأعطيتنا الفرصة أنو نعيشوا ونستمتعوا بالحرية معاك. يا رب علّمنا أنو أحنا نكونوا متواضعين ونقبلوا الحق متاعك من غير تكبّر وتعالي على خاطرك قلت في كلمتك

«إِنَّ اللهَ يُقَاوِمُ الْمُتَكَبِّرِينَ، وَلَكِنَّهُ يُعْطِي الْمُتَوَاضِعِينَ نِعْمَةً». يعقوب 4: 6

لو عندك سؤال أو إستفسار إكتبلنا في الفاسبوك وفما شكون يتواصل معاك