كلمة نشارك منستعملوهاش برشا أما نعيشوها كل الوقت في حياتنا. المشاركة مع الأخرين حاجة مهمة في حياة الإنسان. كي نفرحوا نحبو نشاركوا فرحتنا مع الناس إلّي نحبوهم وكي نحزنوا نحبوا نشاركوا وجيعتنا مع الناس إلّي تحس بينا.
أفكارنا، إختراعاتنا، إكتشافاتنا، الدروس إلّي نتعلموها… عندها قيمة أكبر برشا وقت إلّي نشاركو بيها مع الأخرين ووقتها نستفادوا ونفيدو أكثر. أساس الحياة هو المشاركة. راجع حياتك توا تلقاها الكلها تدور على الكلمة هذي: أي حاجة مهمة في حياتك أنت تحب تشاركها مع أقرب الناس ليك.
ما نتصورش فمّا موضوع أهم وأقوى من الله وعلاقتنا بيه وحياتنا معاه. هذا مركز حياتنا. وما نجموش نعيشوا من غير ما نشاركوا مع غيرنا المواضيع إلّي تخص الله.
لازم نفهموا بالباهي أنو المشاركة متعنيش أنو كل واحد يحب يفرض رايو ويغير راي إلّي قدّامو وما تعنيش زادا أنّي نحسب إلّي قدّامي جاهل ونبدا نعلّم فيه. المشاركة ديجا من الكلمة تعني أنّو أحنا مع بعضنا عندنا حاجة كيف كيف وهي أنّو أحنا نحبّوا ربي ونحبوا نعرفو عليه أكثر ونحبوا نتعلموا حاجات تخلّينا نقربوا منّو أكثر.
مهما تكون ديانتك، مسيحي وإلا مسلم مهتم أنك تتعرّف على كلمة ربّي في الإنجيل أنت مدعوا باش تشارك إلّي تعلّمتوا مع الناس إلّي دايرة بيك. علاش؟ على خاطر انت عرفت وهوما زادا من حقهم يعرفوا. وعلى خاطرك تحبهم، تلقى روحك تحب تشارك إلّي عرفتوا على ربّي. وقتلّي تحكي على ربي هذا ميعنيش إلّي أحنا نحكيوا على ديانات معينة أما على علاقة معاه وإكتشاف ليه ولمحبتو ليك. هذاكا علاش المشاركة تبدا مليانة محبة وإحترام وتقدير للآخر ومفيهاش تعصّب.
مش لازم تبدا عندك معرفة كبيرة باش تشارك مع الآخر. بالعكس الحاجة الصغيرة إلّي تعلّمتها على ربي وعلاقتو بالإنسان تنجّم تتشارك بيها مع الناس إلّي قريبتلك، عايلتك وإلا صحابك. ومنها تنجم تستخرج دروس عظيمة تغيّرلك حياتك وتخلّيك إنسان جديد.
إكتشاف الله ومعرفتو رحلة مزيانة برشا ومليانة بركات وتغيير في ذواتنا. نشجعك كمّل بحثك أما مش وحدك. شارك ناس تعرفهم وتثق فيهم، صحابك، عايلتك وإلا جيرانك.
لو عندك سؤال أو إستفسار إكتبلنا في الفاسبوك وفما شكون يتواصل معاك